ZYMK

Òrganizatorowie latosy Téatralny Jasseni serdeczno rôczą Zymkòwców na lëteracczé warkòwie, jaczé mdą 7 i 8 lëstopadnika w Bëtowie i Jasseni.
7 lëstopadnika (piątk) ò gòdz. 17.00 w bëtowsczim zómkù mdze kôrbiónka ò kaszëbsczi lëteraturze, to je ò felënkù kriticzi, ò pisarsczich jideòlogiach, nowëch pisarsczich zortach ëtd.
8 lëstopadnika (sobòta) ò gòdz. 10.00 w jassonsczi szkòle abò w dodomie kùlturë, mdze zéńdzenié z Danielã Kalinowsczim, jaczi mdze gôdôł ò téatrze, a pòtemù z Danielã Òdiją pisôrzã ze Sztolpù, chtëren mdze prawił ò pisarsczim fachù.
Je mòżlëwòsc spaniô w Jassoni.

Wlézë na ti starnë, bë dowiédzec sã kąsk wicy

Wejrowsczé zéńdzenié Zymkòwców. Zmiana przédnika karna

Nadszedł ju nen dzél w rokù, czej drzéwiãta tracą swòje lëstë a dzéń robi sã corôz to krótszi. Równak w Mùzeùm Pismieniznë i Kaszëbskò-Pòmòrsczi Mùzyczi w Wejrowie wcyg dérëje zymk. Jak to je mòżlëwé?
Sta sã tak dlôte, że w sobòtã 27 séwnika 2008 rokù ò 12 w pôłnié òdbëło sã prawie w tim placu pòstãpné zéńdzenié nôleżników karna Zymkòwców. Tim razã bëło na nie przëszłé dosc wiele lëdzy. Òkróm donëchczasnégò przédnika, to je Rómana Drzeżdżóna, bëtnikama zetkaniô bëlë: Hana Makùrôt, Alicjô Scziba, Lucyna Sorn, Mateùsz Bùlmann, Słôwk Chòlcha, Tómk Fópka, Słôwk Fòrmella, Adam Hébel, Słôwk Kllas (felało jesz Sławka Krause; razã z nim bëło bë jaż szterzech Sławków), Dark Majkòwsczi i Karól Rhode.
(wicy…)

Serdeczno rôczã Zymkòwców a wszëtczich lubòtników kaszëbsczi lëteraturë
na zéńdzenié jaczé mdze
27 séwnika (sobòta) ò gòdz. 12
w Mùzeùm Kaszëbskò-Pòmòrsczi Pismieniznë i Mùzyczi w Wejrowie
sza. Zómkòwô.

W programie:
Òbgôdanié nônowszich zymkòwëch dokazów
Kôrbiónka ò latosym wëdanim zsziwkù Zymkù
Zaplanowanié robòtë na 2009 r.

1 rujana, o godz. 6 pp w Pòwiatowi i Miesczi Bibliotece Pùblëczny w Wejrowie òdbãdze sã zéńdzenié Zymkòwców z czëtińcama, jaczé je dzélã projektë Z ksążką òd Kaszëb do Eùropë.
Zymkòwców, chtërny chcą wzyc ùdzél w zéńdzenim baro proszã ò kòntakt na mòją mejlową adresã.
Róman Drzéżdżón

Tuwò mòżeta przeczëtac malińczi sztëczk dokazu s-f NALAZŁÉ W BËTOWIE, jaczi napisôł Jón Natrzecy.

Pierszi dzél
ZAPADŁI ZÓMK

Lotkasta na sztërk zawisła nad zelonyma górama. Dokładno nad ną nôwëższą, na chtërny stojała stôrô drzewianô wieża.
– Zdrzë profesorkù. To je szemrëckô zdrzélniô. Bùczi co rok roscą wëżi a wëżi. Za pôrã lat, czej z wastą bãdzemë lecelë nazôd, nick ju nie dozdrzimë – kąsk zgrëzlëwò pilot zwrócył sã do wësoczégò chłopa, chtëren sedzôł wëstrzód paczétów na slédnym sedzenim lotkastë. Jón wiedzôł, że profesor Armikùra nie chce z nim gadac, a òsoblëwò ò nëch pôrã miesącach, a mòże i latach, jaczé przińdze mu przeżëc w tëch barabónach. Òd czej wëlecelë z Gdùńska badéra le sôrkôł, na Jóna zdrzôł z pańska, jak colemało lëdze ze strefë pòmieszkaniô, abò ti ksãżëcowi, chtërnëch  młodi pilot równo nie cerpiôł.
(wicy…)

W kùńcu lëpińca rôczny jô béł do Bëtowa na warkòwnie namienioné lëteraturze Science Fiction pò kaszëbskù, chtërné prowadzëł prof. Edmùnd Wnuk-Lipińsczi – aùtór trzëksãdzi s-f  pt. Apostezjon.
Jadącë do Bëtowa rechòwôł jem kùliż dokazów negò ôrtu napiselë kaszëbsczi pisôrze. Wiele mie nie wëszło – pôlców jedny rãczi mie sygło. Szkòda, wierã prawie takô lëteratura bëłabë baro atrakcyjnô dlô czëtińców, òsoblëwie tëch młodszich.

(wicy…)

Wicy jak 4 gòdzënë warałë lëteracczé warkòwnie zòrganizowóné bez Piotra Dzekanowsczégò, przédnégò redachtora Bëtowsczégò Kùriera.
W sedzbie Kaszëbskò-Pòmòrsczégò Zrzeszeniô, 26 lëpińca 2008 r., na bëtowsczim zómkù zeszlë sã lëteracë jaczich czekawi pismienizna s-f ë ùtwórstwò negò ôrtu w kaszëbsczim jãzëkù. Prowadnikã pò swiece s-f béł prof. Edmùńd Wnuk-Lipińsczi, socjologa ë aùtór trzëksãdżi pt. Apostezjon, chtëren gôdôł ò tim, jak napisac bëlny dokôz s-f.
Pioter Dzekanowsczi dôł zeszłim w darënkù ksążeczkã pt. Nalazłé w Bëtowie - je to pierszô w historëji kaszëbsczi pismieniznë ksążka s-f napisónô w rodny mòwie.

Mùzeùm Kaszëbskò-Pòmòrsczi Pismieniznë i Mùzyczi w Wejrowie
rôczi na promòcjã ksążczi
br. Zbigórza Joskòwsczégò
pt.:
BISKUPI Z ZIEMI KASZUBSKIEJ
Słownik biograficzny
chtërnô mdze 5 lëpińca 2008 rokù, ò gòdz. 6 pp
w Mùzeùm kòl szasé Zómkòwi 2a w Wejrowie
Laùdacjã wëgłoszi ks. Leszk Jażdżewsczi

W niedzelã, 15 czerwińca, w wejrowsczim mùzeùm bëła ùroczëzna wrãczeniô nôdgrodów dobiwcóm pisarsczégò kònkùrsu miona Jana Drzéżdżóna.
Wëstrzód nôlepszich pisôrzów latoségò kònkùrsu w kaszëbsczi kategòrie bëlë Zymkòwcë: Dark Majkòwsczi (III môl za òpòwiôdanié Bùdzta spiącëch. Kaszëbsczé zwiercadło) ë Sławòmir Kraùse (wëprzédnienié za òpòwiôdanié Bielisë).
Pierszi môl dobëł Jerzi Hoppe z Rëmi (Ò pòdzymku 45 rokù przëszlë Ruscë…), drëdżi Kristina Lewna z Chmieleńca k. Bólszewa (Stach i Roch).
Òkróm tegò bëła téż promòcjô ksążczi pt. Rost na kamiznie, w chtërny nalazłë sã kaszëbsczé dokazë, m.jin. Zymkòwców: Grégòra J. Schramke, br. Zbigórza Joskòwsczégò, Rómana Drzéżdżóna, nôdgrodzoné w ùszłich kònkùrsach. Ksążkã mòże dostac w Mùzeùm Kaszëbskò-Pòmòrsczi Pismieniznë i Mùzyczi w Wejrowie.

Part Kaszëbskò-Pòmòrsczégò Zrzeszeniô w Baninie
razã z
Zespòłã Òglowòsztôłcącëch Szkòłów nr 2 w Kartuzach
ë Partã Kaszëbskò-Pòmòrsczégò Zrzeszeniô w Kartuzach
rôczą na
II FESTIWAL KASZËBSCZÉGÒ HÙMÒRU
SZPÒRT MÙSZI BËC
jaczi mdze 15 czerwińca (niedzela), ò gòdz. 1 pp.
w Zespòle Òglowòsztôłcącëch Szkòłów w Kartuzach, òs. Wëbicczégò 33